【韓流】權權玩騎膊馬陪子女睇初雪 素顏河智苑赤腳睇雪
11月28日(三) 蘋果娛樂
韓國迎來初雪，唔少藝人都有喺社交網分享雪景。
好似韓國男星權相佑同演員老婆孫泰英今年結婚十周年，育有一對子女嘅佢哋一家四口好幸福。孫泰英同權權婚後多年依然恩愛，孫泰英亦不時更新Instagram上載家庭照。而今日孫泰英就上載一張權權孖子女一齊睇雪嘅溫馨照，當中權權就讓女兒玩騎膊馬，大仔則喺二人旁邊，三人齊齊望住街上嘅雪，認真sweet sweet。
而《奇皇后》、《秘密花園》嘅40歲女星河智苑，之前辭演咗MBC新劇《PROMETHEUS》，暫時未有新作嘅河智苑亦可以喺家中休息，佢今日見到初雪亦即時同粉絲分享，更拍片上網等大家睇下初雪有幾靚，又留言：「凌晨5點57分開始飄雪了，然後初雪來了。」同時又指天氣好冷，路亦好滑，叫大家唔好跌倒。片段中河智苑似剛剛起床即行出去小花園睇雪，所以佢無懼寒冷赤腳而行，素顏上陣被粉絲大讚好靚。
