【韓流】行程有衝突 河智苑宣佈辭演2億大製作新劇
10月11日(四) 蘋果娛樂
韓劇《奇皇后》、《秘密花園》嘅40歲女星河智苑，早前落實主演MBC新劇《PROMETHEUS》飾演女特工，並與神劇《太陽的後裔》男星晉久及荷李活電影《移動迷宮》（Maze Runner）系列嘅32歲美籍韓裔男星李起弘合作。
不過河智苑所屬嘅事務所噚日突然宣佈河智苑已決定辭演劇集，不過未有透露辭演嘅原因。直到今日，事務所先發聲明表示，因新劇拍攝日程比原定計劃延遲咗，與之後嘅工作重疊，所以與劇組商量後，河智苑遺憾地決定辭演。
《PROMETHEUS》預計耗費300億韓圜(約2.05億港元)拍攝，講述一批被派到國外嘅朝鮮核專家喺回國途中神秘失蹤，各國為咗調查事件而展開諜戰。新劇原定明年上半年播出，但因河智苑嘅辭演，令劇集能否按原定計劃拍攝、播出成為未知數。
