【韓流】好大犧牲！ 40歲河智苑為新節目公開素顏同屋企

2018年7月15日

【韓流】好大犧牲！ 40歲河智苑為新節目公開素顏同屋企
7月15日(日) 蘋果娛樂

現年40歲嘅韓國女星河智苑，早前飛咗美國拍攝tvN新綜藝節目《伽利略：甦醒的宇宙》，與節目《叢林的法則》男星金炳萬、女團gu9udan成員金世正、2PM嘅Nichkhun等一齊研究火星，佢哋喺節目內會到美國猶他州所在嘅火星研究基地MDRS(Mars Desert Research Station)生活一周，一齊研究火星生存、探險，並通過進行科學實驗等活動獲得火星人嘅生存體驗。

而節目今日首播，佢哋一眾出演者就要為去研究基地做準備，同時河智苑仲好大方咁公開咗佢嘅寓所面貌，當日河智苑落實出演節目係因為佢好鍾意有關天文宇宙嘅嘢，而佢嘅房內亦可以見佢有天文望遠鏡，睇嚟佢平日都有睇星。同時河智苑亦喺節目內公開素顏樣，亦有佢參與太空人訓練時，因為要長時間喺一個狹窄嘅空間內，令佢鬱悶得爆喊。
另外，Nichkhun嘅兩位隊友澤演同Jun. K都先後入伍，今日佢哋嘅事務所就公開咗兩人着住軍服嘅合照，原來佢哋都啱啱獲得休假，所以即爭取時間見面，認真好感情。