【韓流】再次展示身手 40歲河智苑新劇做女特工
7月5日(四) 13:00 香港蘋果日報
韓劇《奇皇后》、《秘密花園》嘅女星河智苑，上月底度過40歲生日，佢早前孖女團gu9udan成員金世正等人出發去美國拍攝tvN新綜藝節目《伽利略：甦醒的宇宙》，新綜藝將於本月15號首播。
而河智苑去年出演《醫療船》後就未有新劇推出，不過今日韓國方面就傳來消息，河智苑將落賁出演新劇《PROMETHEUS》，喺劇中佢將會飾演女特工，並將於今年底播出。劇集講述一批被派到國外嘅朝鮮核專家喺回國途中神秘失蹤，各國為咗調查事件而展開諜戰。
根據製作公司方面，劇中女特工角色由劇本一構思已以河智苑作為藍本，可以話完全為河智苑度身訂造嘅角色。而河智苑嘅打女形象深入民心，早年已喺《茶母》、《秘密花園》內有打鬥場面， 去年演出嘅《追捕》更飾演女殺手。
另外，原本男主角方面屬意由《與神同行》男星朱智勛出演，但最終朱智勛因為有其他工作，所以就推咗。
